Chireta

Iste articlo ye sobre o plato dito chireta. Pa l'au se veiga Melanocorypha calandra.

Chireta
Chiretas
Atras denominacions
Gireta, girella
Orichen cheografico
Cocina:	Gastronomía aragonesa
Orichen:	Aragón Catalunya
Se mincha en:	Ribagorza, Sobrarbe y Semontano de Balbastro, Pallars Sobirán y Alta Ribagorza.
Elaboración
Ingredients:	Bodiello d'o cordero, arroz, liviano, corazón y atros repuis d'este animal, ambrona, preixil, allo y atros condimentos

A chireta^[1] ye un plato tipico d'Aragón propio d'a cultura rural que aproveitaba ta la birolla tot lo que teneban a man. Consiste en o bodiello d'o cordero (chireta significa en aragonés "piel tornada") cusida y farsida d'arroz apanyau y liviano, corazón y atros repuis d'este animal, chunto con ambrona, preixil, allo y atros condimentos. As chiretas se feban bullir.

Forma de fer-se

Ye tradicional en as comarcas de Ribagorza, Sobrarbe y Semontano de Balbastro, en a zona d'o Pireneu Aragonés. En as comarcas catalanas de la Alta Ribagorza y Pallars, a chireta ye conoixida como gireta, o girella, respectivament. Como ye birolla propia de montanya, no s'estrafollaba brenca: malas que s'heba matau o cordero s'emplegan ta fer-la os bodiellos, la tripa, o cuello y a carne capolada de figado ficando-ie o corazón y os livianos. Esto se mezcluceya con arroz, panceta capolada u tocino, pernil, preixil, allo, una micachona de canela, sal y pimienta blanca.

Lo de difuera se limpia y escarra con vinagre blanco ixauguando bien d'antes de farsir-la. A farsa contiene arroz mezclau con allo, preixil capolau y sal. Se replenan de farsa as tripas d'a mitat a dos tercios d'a forma con a mezcla d'arroz, con ficancia de no posar-ne-ie de mas, ya que l'arroz se rinfla malas que as chiretas bullen en o caldo, si no, podrían petar.

Las chiretas gosan servir-se calients como plato principal. Tamién en rodetas, enfarinadas, rebozadas, y fritas.

Curiosidaz

En 2002, s'inició o Festival d'a Chireta en Escalona, que ha estau funcionando dende alavez, anyo sin atro, en a segunda quincena d'octubre. En 2002, se logró un record Guinness por a chireta mas larga y mas pesada en o mundo: 103,75 metros de largo, fendo un total de 220 kg.