Yohane Mbatizaji

Yohane ambatiza Yesu (mchoro wa Kifaransa mnamo karne ya 15)

Yohane Mbatizaji (7 K.K. - 29 B.K. ?) alikuwa nabii wa Kiyahudi aliyeishi wakati wa Yesu wa Nazareti. Kufuatana na Luka 1-2 Yohane na Yesu walikuwa ndugu na mama zao walikuwa wazito wakati mmoja.

Habari zake zinapatikana katika Biblia na pia kwa Yosefu mwanahistoria.

Utoto

Kadiri ya Injili ya Luka alizaliwa kimuujiza na kuhani mzee Zakaria na mke wake tasa Elizabeti.

Bado utotoni alikwenda kuishi jangwani, labda kutokana na kifo cha wazazi.

Wataalamu mbalimbali wanadhani alikuwa akiishi kati ya Waeseni, wafuasi wa madhehebu ya Kiyahudi yenye msimamo mkali kuliko ule wa Mafarisayo.

Mhubiri katika jangwa

Alipofika utu uzima alianza kuhubiri "mwaka wa kumi na tano wa utawala wa Kaisari Tiberio" (Luka 3,1) yaani mnamo 27/29 BK.

Yohane alikuwa mhubiri aliyewaonya kwa ukali wasikilizaji wake na kudai wajiandae kwa hukumu ya Mungu.

Akawakaribisha wapate ubatizo wa maji kama alama ya mtakaso na mwanzo mpya.

Mathayo 3 yasimulia: "4 Yohane alivaa vazi lililoshonwa kwa manyoya ya ngamia, na ukanda wa ngozi kiunoni mwake. Chakula chake kilikuwa nzige na asali ya mwituni. 5 Basi, watu kutoka Yerusalemu, kutoka mkoa wote wa Yudea na sehemu zote za kandokando ya mto Yordani, walimwendea, 6 wakaziungama dhambi zao, naye akawabatiza katika mto Yordani."

Alimbatiza pia Yesu ambaye naye baadaye akaanza kuhubiri.

Hivyo katika Injili Yohane anatazamwa kama mtangulizi wake aliyetangaza ujio wake kama "Mwanakondoo wa Mungu aondoaye dhambi ya ulimwengu" na atakayebatiza kwa Roho Mtakatifu.

Kifo cha Yohane

Yohane katika mahubiri yake alipinga matendo ya mfalme Herode Antipa akakamatwa naye.

Kufuatana na Marko 6 aliuawa alivyotaka Herodia mke wa mfalme, akakatwa kichwa kilichopelekwa katika sinia au bakuli mbele ya mfalme na wageni wake wakiwa wanasherehekea sikukuu yake ya kuzaliwa.

Wafuasi wa Yohane

Yohane alikuwa pia na kundi la wafuasi walioendelea kama ushirika baada ya kifo chake.

Dini ya Wamandei inadai kuwa imetokana na ushirika huo na katika Kurani wanaitwa "sabiyuna" au wabatizaji.

Yahya katika Kurani

Yohane anatajwa kwa heshima katika Kurani pia, kwa jina la nabii Yahya.

Kichwa kimojawapo kinachosemekana ni cha Yohane kanisani mjini Roma

Fuvu la kichwa

Kichwa cha Yohane kiliaminiwa kiliweza kutunzwa kikaheshimiwa kama salia takatifu.

Kuna vichwa mbalimbali vilivyotajwa kuwa kichwa cha Yohane.

Kaburi moja la kichwa kipo mjini Dameski kilipokuwa ndani ya kanisa kuu, na baada ya Waislamu kubomoa kanisa kaburi lilitunzwa na liko sasa ndani ya msikiti wa Umawiya.

Kichwa kingine kinachotwa ni cha Yohane chaonyeshwa katika kanisa la "San Silvestro in Capite" mjini Roma; kingine huko Amiens (Ufaransa).

Kuna pia mikono ya Yohane inayoonyeshwa mahali mbalimbali.

Makala hii kuhusu mtu wa Biblia bado ni mbegu. Je, unajua kitu kuhusu Yohane Mbatizaji kama habari za maisha au kazi yake? Labda unaona habari katika Wikipedia ya Kiingereza au lugha nyingine zinazofaa kutafsiriwa? Basi unaweza kuisaidia Wikipedia kwa kuihariri na kuongeza habari.