Durres

Durres
Durrësi
Lidnanznam;	Flag;
Valdkund	Albanii
Eläjiden lugu (2023)	101,728 ristitud
Pind	46 km²
Pämez'	Emiriana Sako; (2020—)
Telefonkod	+355-(0)52
Aigvö	tal'vel UTC+1,; kezal UTC+2

Durres (alb.: Durrësi, Durrës [ˈdurəs]) om lidn Albanijan päivlaskmas, keskuzpalan mererandal. Se om valdkundan kahtenz' lidn eläjiden lugun mödhe, om Durresan agjan administrativižeks keskuseks da palaks.

Istorii

Eländpunktan aluz om pandud Epidamn-nimenke (amuižgrek.: Επίδαμνος) vl 627 EME. Rimalaižed udesnimitiba lidnad Dirrahijaks (Dyrrachium). Manrehkaidused murenziba lidnad lujas vll 314, 1273, 1926. Vl 1947 valdkundan ezmäine raudte radaškanzi lidnas.

Enver Hodžin diktaturan aigan Durres šingotihe jügedal tegimištol, saudihe meriportad, vl 1980 vagonantegim oli töhöpästtud. Nügüd'aigan lidn šingotase meriportal, sömtegimištol i turizmal, opendusen holitišil.

Geografijan andmused

Durresan municipalitetan sijaduz valdkundas vn 2015 kartal

Lidn sijadase municipalitetan i agjan suvipäivlaskmas, Adriatižen meren i sen Durresan merikaran randal, läz meren tazopindad korktusil.

Matkad Tiran-pälidnhasai om koumekümne kahesa kilometrad päivnouzmha, avtotel vai raudtedme. Raudted ühtenzoittas valdkundan kaikidenke järedoidenke lidnoidenke.

Klimat om Keskmeren. Keza om päivoikaz lujas, tal'vaig om pil'vekaz. Voden keskmäine lämuz om +17,9 C°, kezakun-sügüz'kun +23,5..+27,7 C°, tal'vkun-keväz'kun +8,8..+12,5 C°. Ekstremumad oma −6,2 C° (viluku) i +39 C° (eloku). Paneb sadegid 924 mm vodes, enamba kül'mkus-vilukus (121..140 mm kus), vähemba kezakus-elokus (12..30 mm kus). Voib panda lunt tal'vkus-keväz'kus harvoin. Kun keskmäine relätivine nepsuz vajehtase 67..73 % röunoiš voden aigan.

Eläjad

Vn 2011 Albanijan rahvahanlugemižen mödhe lidnfartaliden eläjiden lugu oli 113,249 ristitud 46 km² pindal (se ristitišt oli kaikiš suremb), kaiken municipalitetan — 175,110 ristitud 338,3 km² pindal, agjan koume videndest. Vl 2001 lidnan ristitišt oli 99,546 eläjad.

Edeližed lidnan pämehed oma Valbona Sako (2019) i Vangüš Dako (2006−2019, Vangjush Dako).