Замбия

Замбия Republic of Zambia англ., Icalo ca Zambia (Bemba)
Застава и герб
Розлога	752 617 km²
Обывательство	20 216 029 особ (2023)
Столиця	Лусака
ГДП (ПНС) на особу	$1 435 (2023)
Интернет-домен	.zm
Часова зона	UTC+2 Central Africa Time
Телефонный код	+260
Замбия на Викискладѣ

Мапа Замбии политична

Мапа Замбии физична

Лусака: финансовый центер

Водопад Виктории на рѣцѣ Замбези

За́мбия (анґл. Zambia), официално Замбийска Република (анґл. Republic of Zambia) — внутроземный штат во Выходной Африцѣ. Головне мѣсто — Лусака. Граничить з Демократичнов Републиков Конго на сѣверѣ, Танзаниов на сѣверо-востоку, Малави на выходѣ, Мозамбиком, Зимбабве, Ботсванов и Намибиов на югу, Анголов на западѣ.

До выголошеня независимости в року 1964 — протекторат Великобритании (стара назва Сѣверна Родезия). Глава державы и влады — президент. Законодарный орган — парламент (складеный из президента и еднопалатных Народных зборох). Замбия входить до Сполоченства Народох.

Од выголошеня независимости до року 2023 обывательство выросло три раз.

География

Поверхность — габастое плоскогоря вышкы 1000–1350 м. н. м. з окремыма островныма горами. Характерны суть плоскы западины тектоничного походженя, што творять Восточно-Африцку рифтову систему. На сѣверѣ, при граници з Танзаниов, гора Сунзу (2067 м. н. м.). Клима субекваториална. Середня мѣсячна температура 15–27 °С. Выпады 600–800 мм рочно в басейнѣ середного току рѣкы Замбези; до 800–1000 мм в восточной части плоскогоря и 1000–1400 мм на вододѣлном плато Лунда. Майже вшиткы рѣкы державы належать басейну рѣкы Замбези (найвекшы притокы Кафуе и Луангва), рѣки сѣверной части державы — басейну рѣкы Конго (Заир). Найвекшы озера: Бангвеулу, Танганьика (на югу), Мверу (на востоку). На рѣцѣ Замбези — найвекшый водозбор Кариба. Лѣсы и корчовля занимають 49% територии. В вологых районах — сезонно-воложны тропичны лѣсы и высокотравны саванны, в май засушливых районах — сухы тропичны лѣсы («миомбо») и акацова саванна з баобабом. Около 20 храненых народных паркох (Кафуе, Сиома-Нгвези, Сѣверна и Южна Луангва и иншы).

Економика

Основа економикы — рудокопство, ориентоване на експорт, и нежелѣзна металургия. Доля в ГДП (1986): рудокопства 30%, земледѣлства 18%. По завойованю независимости влада взяла курс на укрѣпленя властной економикы и ограниченя чужоземного капитала. В добываню мѣди (524 тыс. т в 1985) Замбия стоить на первых мѣстах в свѣтѣ. Добывають тыж кобалт (2,2 тыс. т в 1983), цинк (39,2 тыс. т), олово (15,1 тыс. т), стрѣбро, манган, камняной угля.

В земледѣлствѣ занято 65% економично активного обывательства (1983). Ораниця занимать около 3,5% територии, паствиска — около 30% (1983). Основна аграрна култура — мелай (647 тыс. т в 1985); з иншых также доган (2,2 тыс. т), арахис (2,4 тыс. т), цукрова тростина (143 тыс. т), просо, маниок. Паствове скотарство гамуе розширеность мухы цеце. Ставы (1985, в тысячах): рогатый статок 2380, овцѣ 40, козы 350, свинѣ 250. Рыболовство в озерах и рѣках (около 78 тыс. т в 1983).

Транспорт

В року 1984 довжина желѣзниць чинила 2,2 т. км, автодорог 40 т. км, в том числѣ асфалтовых и шутровых 14 т. км. Автопарк (1983) — 186 тысяч машин. Свого выхода ку морю 3амбия не мать, зато експорт иде переважно через порты Танзании на Индийском океанѣ. Одты иде и нафтовод из Дар-ес-Салаама.

Жерела

• Zambia //THE WORLD FACTBOOK https://www.cia.gov/the-world-factbook/countries/zambia/
• Трёшников А.Ф. Географический энциклопедический словарь: Географические названия. /Гл. ред. А. Ф. Трёшников. — 2-е изд., доп. — М.: Сов. энциклопедия, 1989.— Стр 172–173 из 592. ISBN 5-85270-057-6русс.