Polizzia local

Quest articol chì l'è scrivud in lombard, con la Noeuva Ortografia Lombarda

La polizzia comunala de Zurigh

La polizzia local a l'è 'l corp de polizzia che l'è miss ai dependenze de 'n ent local, de solit un comun, in del cas se parla anca de polizzia municipala. De solit, soratut in Europa, 'sti corp gh'han men de poder di forze de polizzia statai o nazzionai o di diferenze in di possibilità de armament, per esempi in Italia poden minga portà el manganell e in Polonia doperen minga i armi de foeugh.

Per paes

Europa

Franza

Per savenn pussee, varda l'articol Polizzia municipal (Franza).

In Franza la Polizzia municipal (Police municipale) la depend di comun e la gh'ha men de poder di collega de la Polizzia nazzional e de la Gendarmaria: i so polee poden vesser armad e se ocupen soratut de trafegh, de sigurezza urbana pisinina e de protezzion civil.

I comun de campagna poden anca havègh una polizzia campester.

Italia

Per savenn pussee, varda l'articol Polizzia local (Italia).

In Italia la Polizzia local l'è organizada segond i lesg del Stat e di Region, rispetivament ai so competenze, e organizada a nivell de comun, de union de comun e de provincia: inn considerad per la pupart di agent de publega sigurezza e gh'hann i competenze de la polizzia, foeura che per l'orden publegh indova che inn domà sussidiari, e in la pupart di cas inn armad.

Polonia

Per savenn pussee, varda l'articol Guardia cittadina (Polonia).

In Polonia la polizzia local la se ciama Guardia citadina (Straż miejska) e la gh'ha di competenze limitade, per esempi al trafegh o a la patuja, ma poden minga menà via la sgent, foeura che in cas de ris'c imediad: inn minga armad, ma gh'hann despess di sistema per auto-defesa.

Serbia

Per savenn pussee, varda l'articol Milizzia comunal (Serbia).

In Serbia tucc i comun poden havégh una milizzia comunal ma minga tucc l'hann fada su: se ocupen soratut de regolament comunal e problema locai e inn minga armad e poden nanca menà via la sgent.

Slovenia

Per savenn pussee, varda l'articol Guardia municipal.

In Slovenia la guardia municipal (Občinsko redarstvo) la dipend di comun o di consorzi di comun e la gh'ha poder incentrad sul trafegh, anca se poden identifegà la sgent e doperà la forza in cas limitad intant che la se speta la polizzia statal: inn minga armad.

Nom lombard

In del milanes a inn ciamad per di reson storeghe Ghisa, menter in la bergamasca a l'è spantegad pussee el termen Cappellon. Generalment, in la lombardofonia, a inn ciamad sorveliant.

Riferiment

• Ruolo e funzioni della Polizia Locale

Alter proget

Altri progetti

• Wikimedia Commons

• Wikimedia Commons el gh'ha dent imagin o alter archivi su Polizzia local

Vos corelade

• Polizzia metropolitana