Edil

Un edil esseva un magistrato in le Republica Roman qui habeva responsabilitates pro le mantenentia del citate, tal como su edificios, stradas, e mercatos; le disponibilitate de cereales a precios rationabile; e le organisation de jocos public. Illo habeva tamben alcun functiones judicial, con le capacitate de imponer multas e punitiones corporal, ultra le derecto de persequer crimines ante le assembleas. Tamen, circa le medie republica, le cargo esseva principalmente usate pro distribuer largessa e ganiar le favor popular.

Existeva duo typos de ediles: le ediles plebeie e le ediles curule. Le primes esseva create circa 494 a.Ch. como assistentes del tribunos del plebe, dum le ediles curule esseva create circa 367 a.Ch. Ben que originari de differente rangos, ambe typos de ediles finiva per haber quasi le mesme deveres e responsabilitates.