Caravaggio
Michelangelo Merisi, miôr cognossût come Caravaggio (Milan, 29 di setembar 1571 – Porto Ercole, 18 di lui 1610), al è stât un dai plui grancj e influents artiscj talians di ducj i timps. Il so stîl inconfondibil al à segnât il passaç dal Manierisim al Baroc.
Biografie
[cambie | modifiche il codiç]
Nassût a Milan, al è cressût in te localitât di Caravaggio (di dulà che al à cjapât il non di art). Dopo une prime formazion a Milan, in te buteghe dal pitôr Simone Peterzano, al si trasferìs a Rome int al 1592, dulà che al scomençà a otignî ricognossiments par la sô incredibile abilitât di pitôr.
La vite di Caravaggio e fo segnade di episodis dramatics, travajâts e rissis, che lu menarin a scjampâ plui voltis de justizie. Il moment plui critîc al fo tal 1606, cuant che, dopo vê copât un om , Ranuccio Tomassoni, in une barufe, al scuèn bandonâ Rome. Al passà i ultins agns de sô vite jenfri Napul, la Sicilie e Malte, simpri in maravee e ricercjât. A Napul, al prodûs oparis di une intensitât dramatiche estreme, come Lis Sièt oparis di misericordie e la Flagjelazion dal Crist. A Malte, arivât tal 1607, al vèn nominât Cjavalîr dal Ordin di Malta, par po jessi arestât e scjampâ sù par sù. In cheste fase, la sô penelade e devente plui svelte e dramatiche, cun oparis che al lasse in ereditât ae isule, su dut La decapitazion dal Batiste, l'unic cuadri firmât dal artist. Finì la sô vite a Porto Ercole, in circostancis ancjemò in bande misteriôsis, intant che al cirive di tornâ a Rome par otignî la gracie.
Stîl e tecniche
[cambie | modifiche il codiç]
La innovazion principâl di Caravaggio e je la gjestion de lûs. Il so "chiaroscuro" (o "tenebrisim") al creé contrastis dramatics tra zonis di lûs intensissime e fondâls in ombrose scuritât. Chestis sieltis a esaltin la plasticitât des figuris e il sentiment des sênis.
Un altri aspièt rivoluzionari al è il realisim. A diference dai artiscj dal so timp, Caravaggio al depeve modelis cjapâts de strade: puars, prostitutis e artigjans, che al trasformave in sants e Madonis. Cheste sielte al puartà in plui ocasions a critichis e al refudament des sôs oparis par part de glesie, che considerave il sô lavôr "indecorôs".
Curiositâts
[cambie | modifiche il codiç]
- Il model dai sants: Caravaggio era cussì dedît al realisim che al usave personis comunis come models par figuris sacris. Si conte che par la Muart de Vergjine, al vedi doprât il cuarp di une prostitute neade tal Tibar.
- L'artist "maledêt": La sô vite tumultuose, jenfri barufis, presons e scjampadis, lu à fat deventâ il simbul dal "gjeni e trasgression", un model di artist che al sfide lis convenzions sociâls dal so epoche.
- La firme: La decapitazion dal Batiste a Malte e je l'unic cuadri firmât dal artist, e la firme e je "scrite" cun il sanc che sortìs dal cuel dal Batiste decapitât.
- Il Caràtar: Caravaggio al jere cognossût za al sô timp par jessiun om che veve un caràtar no tant facîl.Cuant che al jere par la strade al veve simpri cun lui la spade par difindisi. Cualchit studi al dîs che il sô caratar dificîl al jere determinât dal "saturnisim" une intossicazion dal plomp , materiâl di produzion des tacis dulâ che al beveve. Une volte , in une ostarie romane , al veve tirât te muse un plat di articjocs a un camerîr che forsît lu veve ofindût.
Oparis principâls
[cambie | modifiche il codiç]Jenfrii siei capolavôrs plui cognossûts si ricuardin:
- "Bacchus" (Galerie dai Uffizi)
- "Medusa" (Galerie dai Uffizi)
- Le vocazion di San Mateu (Glesie di San Luigi dei Francesi, Rome)
- Davìde cun il cjâf di Golia (Galleria Borghese)
- La muart de Vergjine (Museu dal Louvre)
- Sêt oparis di misericordie (Pio Monte della Misericordia, Napul)
- La decapitazion dal Batiste (Concatedrâl di San Zuan, La Valletta)
Ereditât
[cambie | modifiche il codiç]La maniere di piturâ di Caravaggio e à influençât une schirie di imitadôrs, i "caravagjiscj", che àn puartât il so stîl in dut il continent european, dal Spagne ai Paîs Bas (si pense al impat su Rembrandt). Une menzion particolâr meritin i "caravagjiscj napoletans", che àn ereditât il so spirt dramatic. Tra chei che plui si son distinzûts par interpretâ il leam tra lûs e realtât figurativis a figurin Battistello Caracciolo, Jusepe de Ribera (cognossût come il "Spagnoletto") e la grandone Artemisia Gentileschi, che e puartà l'impàt dal stîl di Caravaggio ancje oltre i confins de citât partenopee.
La sô capacitât di interpretâ la realtât cu la intensitât des emozions e fâs di lui un veritabil "pionî" de modernitât.
Bibliografie
[cambie | modifiche il codiç]- Roberto Longhi, Il Caravaggio, Editori Riuniti, 1982.
- Maurizio Calvesi, La realtà del Caravaggio, Einaudi, 1990.
Leams esternis
[cambie | modifiche il codiç]- Sît uficiâl dedicât a Caravaggio
- Caravaggio - Enciclopedia Treccani
- Fondazione Federico Zeri - Catalogo online delle opere