Benjamin Netanyahu
Benjamin Netanyahu (21 d'ochobre de 1949, Tel Aviv) ye un políticu israelín, presidente del Likud, un partíu nacionalista de derecha radical, y primer ministru d'Israel.
Foi primer ministru ente 1996 y 1999, ente 2009 y 2021 y nuevamente dende avientu de 2022. Ye ún de los principales responsables políticos de la invasión israelina de la Faza de Gaza en 2023 y sobre él pesa, dende'l 21 de payares de 2024, una orde de detención de la Corte Penal Internacional (CPI) por presuntos crímenes de guerra y crímenes contra la humanidá cometíos contra la población palestina de la Faza de Gaza.[7]
Tres los ataques del 7 d'ochobre de 2023 de Hamás y otros grupos armaos palestinos contra Israel, el gobiernu dirixíu por Netanyahu inició bombardeos masivos sobre Gaza y, a finales d'ochobre, una invasión terrestre del territoriu. Como primer ministru, Netanyahu foi la máxima autoridá política del gobiernu encargáu de decidir y supervisar la guerra y la invasión, que provocaron la destrucción d'amplies zones de Gaza, el desplazamientu de la mayor parte de la so población y decenes de miles de muertes palestines.[8]
Invasión de Gaza y crímenes de guerra
El 21 de payares de 2024, la Corte Penal Internacional emitió una orde de detención contra Netanyahu y l'entós ministru de Defensa Yoav Gallant. Los xueces determinaron qu'había motivos razonables pa creyer que dambos teníen responsabilidá criminal individual como coautores del crime de guerra d'usar la fame como métodu de guerra y de los crímenes contra la humanidá d'asesinatu, persecución y otros actos inhumanos. La CPI concluyó provisionalmente que Netanyahu y Gallant privaron de manera intencionada y consciente a la población civil de Gaza d'alimentos, agua, melecines, material médico, combustible y electricidá, y que nun existía una necesidá militar clara que xustificara estes restricciones. La Corte señaló que les condiciones impuestes causaron muertes por malnutrición y deshidratación y obligaron, ente otros efectos, a realizar operaciones y amputaciones, incluyíes a neños, ensin anestesia. Tamién consideró qu'había motivos razonables pa creyer que Netanyahu tenía responsabilidá como superior civil pol crimen de guerra de dirixir intencionadamente ataques contra la población civil.[9]
Xenocidiu en Gaza
En setiembre de 2025, la Comisión Internacional Independiente d'Investigación sobre los Territorios Palestinos Ocupaos de les Naciones Xuníes concluyó qu'Israel cometiera y siguía cometiendo xenocidiu contra'l pueblu palestín de Gaza. La Comisión estableció que les autoridaes y fuercies israelines cometieren cuatro de los cinco actos constitutivos de xenocidiu recoyíos na Convención pa la Prevención y la Sanción del Delitu de Xenocidiu: matar miembros del grupu, causa-yos daños físicos o mentales graves, imponer condiciones de vida destinaes a provocar la so destrucción física total o parcial y aplicar midíes destinaes a impidir nacencies.[10] La mesma Comisión examinó específicamente les declaraciones de Netanyahu y concluyó que quedaba establecida la incitación direuta y pública a cometer xenocidiu, prevista como delitu nel artículu III de la Convención, y que Netanyahu podía ser procesáu por incitación al xenocidiu.[11] La orde de detención de la CPI nun inclúi, sicasí, un cargu individual de xenocidiu contra Netanyahu: los delitos polos que ta buscáu pola Corte son crímenes de guerra y crímenes contra la humanidá. Israel niega cometer xenocidiu y refuga tanto les acusaciones de la CPI como les conclusiones de la Comisión de la ONU.
Referencies
- 1 2 3 «חה"כ בנימין נתניהו». Knesset.
- ↑ URL de la referencia: https://www.vanityfair.com/news/1996/06/benjamin-netanyahu.
- ↑ «חה"כ בנימין נתניהו». Knesset. Consultáu'l 11 febreru 2015.
- ↑ Afirmao en: autoridaes BNF. Identificador BnF: 125261531. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
- ↑ URL de la referencia: https://www.biu.ac.il/en/about-bar-ilan/overview/doctorates-and-prizes/doctorate-recipients.
- ↑ URL de la referencia: https://www.aei.org/special-features/2015-annual-dinner/.
- ↑ Benjamin Netanyahu, Knesset. Consultáu'l 6 de setiembre de 2026.
- ↑ Mapping Israel's ground invasion of Gaza, Reuters, 30 d'ochobre de 2023.
- ↑ Situation in the State of Palestine: ICC Pre-Trial Chamber I issues warrants of arrest for Benjamin Netanyahu and Yoav Gallant, Corte Penal Internacional, 21 de payares de 2024.
- ↑ Legal analysis of the conduct of Israel in Gaza pursuant to the Convention on the Prevention and Punishment of the Crime of Genocide, Naciones Xuníes, 16 de setiembre de 2025.
- ↑ Report of the Independent International Commission of Inquiry (A/80/337), Naciones Xuníes, 14 d'agostu de 2025.
Enllaces esternos
| Control d'autoridaes |
|
|---|
Datos: Q43723
Multimedia: Benjamin Netanyahu