Soldeu

Soldeu
Localidat d'Andorra
Soldeu
Estau  • Parroquia  • Veïnat	Andorra Canillo Soldeu
Población  • Total	622 hab. (2022)
Altaria  • Meyana	1.826 m.
Codigo postal	AD100
Coordenadas	42°34’36’’N 1°40’ 1’’E
Soldeu Soldeu en Andorra

Soldeu ye un lugar d'a parroquia de Canillo, en o Prencipau d'Andorra. En l'anyo 2022 teneba 622 habitants.

Cheografia

Se troba situau en una costera debant d'o forcallo d'a Valira con a val d'Incles a 1.826 m d'altaria, lo que fa que siga o lugar mas altero d'Andorra y d'os Pireneus. Dende primerías d'o sieglo XX dica os anys 1930 remataba astí a carretera procedent de Francia y Soldeu yera l'unico lugar d'Andorra que teneba una estación telegrafica francesa. Pa la chent d'as vals, Soldeu yera o zaguer lugar d'Andorra y cuasi en a fin d'o mundo.

Toponimia

Ye un toponimo d'orichen prerromano. Joan Coromines lo relaciona con o lugar pallarés de Solduga y con as antigas ciudaz iberas de Salduba (en a Betica) y Salduie (l'antiga Zaragoza). Seguntes Coromines, tanto ixos antigos toponimos ibers como os pirenencos podrían estar relacionaus con o basco zaldi, zaldu 'caballo' y bide 'camín', seguiu d'o sufixo determinant -a, de manera que zaldubidea 'o camín de caballos' podía haber dau tanto Salduba como Salduie en ibero, mientre que soldube seria l'etimo de Soldeu y solduba, de Solduga.

Historia

Ye curiosa a descripción que en fa Francisco de Zamora, que se i ahuespó os días 25 y 26 de setiembre de 1788, procedent d'Ordino, con a intención d'ir a veyer as aniellas de fierro que seguntes a tradición Loís I o Piadoso heba fixau en a montanya de Juclar como siello d'as libertaz atorgadas a os andorranos. Cal decir que ni zamora ni os suyos acompanyants no podioron encanzar o suyo deseyo y dimpués de dondiar por os estanyos de Juclar habioron de tornar ta Soldeu chipiaus y con ropa y os zapatos malmesos. O tema d'as aniellas ha estau siempre muit popular y divulgau. O periodista Bladé creye que en o sieglo XVIII encara i yeran. Puet estar relacionau con o costumbre d'as comunidaz pastorals d'os Pireneus de fitar con anillas as mugas d'os suyos territorios.

Seguntes l'ilustre Zamora por ixas envueltas Soldeu yera un lugar de seis a vinte casas, con una capiella muit chicota, sufragania de Canillo. Yera un puesto de muito bestiar, que se ninviaba a hibernar ta Urchel. Junoy diz, en 1838, que teneba uns cient habitants y Victorín Vidal, en 1866, diz que teneba ueito u diez casas. Zamora en o suyo viache a iste lugar vino a parar ta casa de Josep Calbó y Areny, casa que recuerda un mitico cheneral Calbó, fillo de Soldeu, que militaba en as tropas d'o rei francés Loís XIV y en qui o rei, se diz, teneba plena confianza, que nunca no perdeba denguna plaza que él esfendeba.

En 1963 as familias Baró, Salvans y Torrallardona creyoron as pistas d'esquí de Soldeu, posteriorment ditas Soldeu-el Tarter. Con o tiempo, o Concello de Canillo y Credit Andorrà se convertioron en os accionistas mayoritarios d'ENSISA, que dimpués se fusionaría con Pas de la Casa-Grau Roig, creyando Grandvalira. En 1965 o Consello cheneral d'as Valls, declaró o esquí como esporte nacional d'Andorra, y hue lo día Soldeu s'ha transformau. En o lugar s'han construyiu bloques d'apartamentos, hotels, botigas y tabiernas. Un nuevo barrio, de grans y nuevas edificacions, ha creixiu a poca distancia d'o lugar en o puesto a on prencipia a telecadiera que puya ta las pistas, que s'inician en Pla dels Espiolets.

Referencias

• Datos: Q24398
• Multimedia: Soldeu / Q24398